Gaming 滑鼠好多時取決於規格之上,不過有時講法只啱一半,因為DPI、反應時間的確會直接應用到個人技術上,但如果滑鼠本身提供「出術」級的功能時,打起上黎又未必係同一個講法。就好似 A4 Tech 新出嘅 V-Track X7 Gaming F4,一句講晒,平靚正。

作為 A4Tech X7 V-Track Gaming Mouse F4 系列,有返一定認識嘅朋友相信唔需要講佢最出名嘅三連射功能鍵啦,預設編程下,按鍵會直接以指定間隔按左鍵三次。另外,透明按鍵為可自訂嘅五段DPI,提供100至3000修改。係一般狀態下,五個DPI分別有不同的LED顯示,但其中綠色及紅色均有兩隻相似顏色,所以LED分DPI功能變得雞肋。

就眼可以見到一大塊防滑軟膠專為姆指而設,而上方四、五鍵位置適中,不過按鍵時姆指移動幅度偏大。

以一隻$200咗右嘅Gaming黎講,F4 竟然設有法碼加重功能。不過唔好咁開心住,因為法碼重量唔太重,加上本身滑鼠都算輕身,就算用晒所有法碼整體先叫有些少實感。而法碼擺放位置於滑鼠下方整體重心集中。

由橫幅見到,滑鼠高度約兩個1蚊,高度適中。

俯視而下,手型專為右手用家,而整隻滑鼠都有磨沙防滑面,用起上黎非常舒服。

值得一提,A4Tech 非常細心,竟然送多4隻3M腳墊,長期戰OK。

USB介面就比較普通,不過有包網線。

到底V-Track係乜,根據官方介紹就係比雷射更精準嘅光學,圖中可以睇到中間光點帶紫嘅部份就係感應器,而窿嘅size就接近一個耳筒插。

講咗咁耐,終於可以講下Driver啦。

軟件方面非常簡單,全部有晒圖文說明,除非各下連中文都唔明就…

比較吸引就係DPI設定部份,平Gaming係可以分別將XY設定,不過DPI由1800直跳到3000就都幾大問題。

當安裝咗軟件,DPI按鍵就變成一個Profile鍵,可以係介面直接關閉過多Profile。

不過好有趣下,每當轉Profile時都會彈舊咁嘅野出黎,當玩緊全螢幕遊戲就真係大獲鳥。

另外,軟件可以設定反應時間,而且有得測試滑鼠。

透過軟件,係可以修改三連特按鍵嘅設定,此外,A4Tech亦一早預設咗部份巨集功能,最為吸引就係180度轉身及多連擊(自動壓槍)。

如果厭預設巨集唔夠精密,唔緊要,內建仲有得自己編程,用法都好簡單,工具會自己cap低你隻滑鼠做過咩,所以大家都懂的。

總結

A4Tech X7 V-Track Gaming Mouse F4 以 $200有找就有齊巨集、法碼、五段DPI功能,而且有得XY軸自設DPI 及 擁有 1000Hz/ms反應時間,試問有邊幾隻同價Gaming會有。加上獨有三連鍵按鍵,打FPS就更加有優勢。此外,整體手感唔差,一般手型用家都會適合。唯一要彈就係DPI 調整會由 1800 直接跳到 3000,控制感較難,加上模式轉換會彈出視窗,變相係設定完Profile要直接熄左軟件。

Van仔 試玩評語

以本人鐘意小型及偏矮身的習慣,V-Track F4 其高度屬於可接受範圍,但值得一讚就整體的防滑設計令滑鼠出奇好揸手。功能方面,四五鍵擺位需要姆指較多的活動,要將四五鍵作為一個長期按鈕未必合適。另外,三連射按鍵位置適中,可用中指作為輔助。不過講到F4 最吸引嘅地方就莫過於軟件,XY軸DPI、Profile、巨集都有,加上有得測試反應時間,真係少數$200內驚喜重重嘅 Gaming Mouse。

蛇仔  試玩評語

筆者本身手大,對滑鼠體積要求特別講究,而A4Tech X7 V-Track Gaming Mouse F4 雖然體積普遍來說屬於大,但厚度唔夠令手掌未能完全覆蓋,不過手感仍然不俗。操控方面,滑鼠本身偏輕,幸好有法碼幫助,重心反而恰到好處,配合姆指設計極為貼身,推滑時唔洗點用力,感覺尚算爽快。至於試玩Battlefield 3時,左右鍵彈力唔錯,開火時延遲性近乎無,要黎打fps遊戲極為適合。至於F4還有巨集及三連鍵等附帶功能,筆者本身唔多有用,但以一隻唔洗二百蚊Gaming滑鼠來說,感覺絕不輸比貴價款式。

型號:A4Tech X7 V-Track Gaming Mouse F4
移動制式:V-Track 光學
手形:大, 高身, 右手專用
鍵數:五鍵、DPI鍵 (單向)、三連射鍵
DPI: 可自訂式 五段式按鍵
備註: 附送腳墊、預設巨集
軟件:有、自訂巨集
保用:1年

建議零售價:HK$189
查詢:升科 (3188 4983)

廣告