打機咁多年,大家對開 Cheat 同外掛都唔會陌生,雖然好多遊戲都會嚴打「出貓」行為,但如果外掛本身連GM都捉唔到,大家又會點睇呢? 最近 BenQ 推出一款專為 Gaming 而設的 LCD顯示器,賣點唔係咩 IPS 或色彩還原技術,而係專為打機而設的 Black eQualizer 功能,想知佢點幫你合法「出貓」接著內容千其唔好錯過!

這款 BenQ RL2240H 屬 22吋 LED 顯示器,外表同一般顯示器無乜分別,一如以往 TN Panel 及 HDMI DVI VGA 介面,雖然條件未如 IPS Panel 可滿足可視角度等要求,但先天擁有 2ms 反應時間,再配合AMA 加速技術,令畫面殘影問題減到最低,為玩家提供最佳顯示器平台。

▲ 雖然 BenQ RL2240H 加入三項功能專為打機而設,但焦點仍是這項「Black eQualizer」,用途是把畫面智能調光,唔同一般加爆 Brightness 的方法,「Black eQualizer」會針對暗位調光,同時會平衡原來光位唔會過份曝光,簡單講o者係幫你睇到更多暗位。

▲ 如果大家唔明可以睇下以上示範圖片,左邊屬正常遊戲畫面,右邊是啟用 Black eQualizer 強度20 的情況,除了畫面整體光左少少,最大分別係屋內場景,由漆黑一片變得一目了然,甚至連躲柱後的士兵都即時現形,咁樣再唔怕有敵人躲係暗位 Camp 住你喇!

▲ 雖然「Black eQualizer」屬硬件功能,不論任何遊戲都可以啟用。不過,道高一尺魔高一丈,唔少新款遊戲都會防止「出貓」,正如英雄聯盟就係其中一款。

▲ 由於每款遊戲對亮度、對比度甚至「Black eQualizer」設定都不同,廠方特別加入Profile 功能,讓玩家無須不斷更改設定。

▲ 除了「Black eQualizer」及「Profile」功能,三項中還有一項稱為「顯示模式」,用途是調整熒幕比例及顯示範圍,可配合一些舊款遊戲上使用,但實用性認真一般。

總結:

BenQ RL2240H 作為針對 Gaming 的顯示器,規格及設計都唔算突出,但透過加入特別功能令Gaming 主題得以實踐,而更重要係售價 $1,500,價錢比 BenQ  XL系列親民得多,如果功能真係有助表現單單幾百蚊都算值得,等同 Gaming 滑鼠價錢貴o的原理一樣。

試玩評語 蛇仔

對於使用 VA Panel 的 BenQ EW2430 筆者來說,相信同好多人反應一樣,見到 TN Panel 就耍手擰頭。不過,用落 BenQ RL2240H 都唔係想像咁差,可能使用相同 Senseye 3 技術關係,差別只係顏色淡少少,同埋灰階較強。至於重點「Black eQualizer」雖然話針對 RTS 遊戲而設,但面對新款遊戲都有「防出貓」實用性唔算好多,相反 FPS 遊戲發揮就好得多,起碼用左可以睇到暗位Camper。缺點方面,個人覺得 RL2240H  唯一缺點係只有 22吋選擇,對於今時今日顯示器要求,最起碼都要有23吋/24吋先睇得舒服。

尺寸 (解像度) 22吋 (1920 x 1080)
面板類別 TN Panel
對比度 靜態(動態) 1000:1 (12M:1)
反應時間 2ms GTG, 5ms (Tr)
亮度 250 cd/m2
輸入介面 DVI, HDMI, VGA
特別規格 n/a
特別功能 Senseye 3, Black eQualizer, Profiles, 熒幕模式

售價: $1,499
查詢: KYT (2690 2168 )

廣告