以前講機械軸鍵盤多數都係D要經常打字嘅文員先會話要買,因為鍵盤壽命夠長,加上按鍵感覺比較有實在感。不過到今時今日,好多Gaming鍵盤都會用到機械軸,對於玩家而言,同一般文書用嘅機械軸(即黑軸)相比,Gaming鍵盤大多數只會提供紅軸,紅軸特性無論壓力同段落感都可以係話無,用黎打機的確會有比薄膜鍵盤有更好優勢。今次介紹嘅 CMStorm Trigger就係Cool媽牌最高階Gaming鍵盤,而且齊晒黑紅青啡軸,但老實講筆者就真係唔多like咁囉。

講得係高階型號,Trigger當然用返Full size鍵盤設計,就咁睇真係同個普通鍵盤無咩分別。

 

不過插著鍵盤就可以見到尚算柔和嘅紅光LED。設計上,用家只要set咗 Storm鍵就可以幫鍵盤調整光度,而設定上提供部份Gaming(WASD、方向同巨集)按鍵著燈功能,暗戰黎講反而實用過全部鍵著燈。

 

Gaming鍵盤就唔會少得巨集鍵,係鍵盤左邊就分別有M1~M5 五組巨集鍵,以高階Gaming黎講算係少,一般未用過巨集鍵盤用家有可能會亂撳錯。另外,F1~F11就分別有Strom功能鍵,不過就要配合原有Win鍵(即Storm鍵)一併使用,即係有Win鍵就無Storm鍵。

  

鍵盤附有防滑手墊,手墊擁有薄膠膜,相信手汗太多就會出現甩皮。而Trigger高度唔算高,唔推起底腳整體高度只有接近個半1蚊銀,鍵粒列陣都唔算高;相反推起底腳,鍵盤排列明顯有有改善,加上鍵粒有輕微弧度,打起上黎就有返些少手感。

 

Trigger 採用鍍金USB接線,直接由一條mini USB連接到本體,方便拆走。而鍵盤連接更達1000Hz反應時間,鬼鍵可能性亦都減低。值得一提就係鍵盤後方有兩組USB2.0 HUB同一個DC 5V嘅供電接頭。雖然可以額外俾電,但到底有咩人會插D大型裝置係個鍵盤到呢。

============================

最後就講講個鍵盤軟件啦,唔知CMStorm係咪同各位玩家有仇口,每次整出黎嘅軟件都係難用到爆。

軟件就分三頁,中間設定頁就算吧啦,純粹俾大家Save Profile同轉用PC嘅Profile。Config頁主要就全係改F1~F12以外按鍵嘅設定,例如我想將個A鍵變成F鍵咁,或者取消咗個A鍵都得,加巨集當然都得啦。另外就係Win鍵(Storm)都係依頁設定,總知就係有Win就無Storm啦。而Storm鍵情況下再撳住Alt/Macro鍵2秒就會錄巨集,但始終無得睇住自己輸入就肯定唔會太好。軟件下面有分別五組Profile,為咗方便辨識,玩家可以另外加張圖上去。

巨集鍵設定頁,玩家要全手動設定。設定支援多個按鍵同時輸入,不過set起黎就幾麻煩,除咗要考慮按鍵時間,亦都要考慮到遊戲本身接唔接收到,所以係要配合頭先錄製Macro嘅設定黎用就相對方便。

總結

CMStorm Trigger 提供多款機械軸供玩家選擇,紅軸版本採用的Cherry鍵貫設作風,提供一個無壓力的按鍵環境。鍵盤係提高之後鍵粒位置適中加上微弧度設計,的確會更有手感。不過Win鍵等同Storm鍵設計明顯唔方便,而巨集設定上都唔算易用。

Van仔 試玩評語

由於筆者好早之前已經轉用咗Microsoft X6,以一個平鍵使用者去用高身鍵粒嘅Trigger只會有彈無讚,因為紅軸特性,加上鍵粒高度,簡單黎講就係手指會處於一個固定姿態去準備撳制,變相令手指更攰。而且鍵粒有高度,即係打高排嘅手指自然要更加晒力。另外,對於少用巨集既筆者黎講,Trigger可以修改全部按鍵真係多舊魚到唔知講咩好。

規格表:
鍵盤模式:標準、全Cherry 紅軸機械按鍵
巨集按鍵:5個巨集鍵、Profile更換式fn鍵
多媒體鍵:11個Fn鍵
特別功能:Storm鍵、Macro鍵、全鍵盤按鍵修改、防鬼鍵設計、1000Hz/ms
驅動軟件:有,支援巨集設定、軟體式五Profile更換

建議零售價:$1280
查詢:Microworks (2950 0175)

廣告