Gaming滑鼠經常都有升級版本出現,依類升級版型號大多都係改用高階感應器。而今次筆者介紹嘅A4tech X7 XL-747H就係V-Track F4嘅升級版。雖然外型就完全一樣架啦,但內裡設計都有唔少改動。最重要都係價錢先係貴個10蚊,你都咪話唔吹漲。

 

就按鍵設計完全一樣,左鍵隔離有三連射按鍵。不過本來磨沙表面就改成厚漆圖案,相對無F4咁好手感。而DPI按鍵就有改動啦,由原來Profile鍵變成六段DPI,外加三色LED作提示。同樣都係四、五鍵,位置不變,防滑橡膠手握位保留。

 

講到成隻滑鼠唔同嘅地方就係底部感應器由V-Track 改成 Laser,前者V-Track雖然DPI較慢,不過就有支援較多接觸面。而XL-747H嘅Laser就提供100~3600DPI,不過適應面就唔多,所以要配合鼠墊使用。另外,XL-747H同樣擁有法碼加重,七粒法碼總重19.5g,加上改用Laser之後整體重量有輕微提升,手感相對F4好。

 

唔好怪我長氣,整體都係同F4一樣,唯一就係表面用咗蜘蛛人件衫,因為無左磨沙面,所以手汗應該幾難頂。

USB介面無改特別野,不過就保留網線,亦支援1000Hz/ms反應時間。

======================================

戲肉黎啦,對比F4,俾多10蚊後果就係連軟件都同你轉埋。

 

軟件首頁,可以見到隻唔識嘅滑鼠,依照大概位置就可以估計按鍵排位。按鍵選項就同F4一樣,亦都支援一堆預設巨集。不過XL-747H只支援兩組Profile,理論係比F4弱。

換軟件嘅原因最主要係感應器問題,因為改用高階Laser,設計就可以支援到六組DPI按鍵。設定可選擇固定DPI數值,同時可改X、Y軸數值,而剛才所講嘅三色LED亦都可以係度睇返排列。

總結

XL-747H雖然設計同F4完成一樣,不過更換Laser感應器令滑鼠支援6段DPI及3600DPI,性價比已遠超$10。此外,組件關係令整體重量微升,輕微改善F4的重量不足問題。不過唯一要彈就係滑鼠表面改用漆面,令手感有下降。值得一提,XL-747H反而無送後備底腳。

型號:A4Tech X7 Anti-Vibrate Laser Gaming XL-747H
移動制式:Laser 3600DPI
手形:大, 高身, 右手專用
鍵數:五鍵、DPI鍵 (單向)、三連射鍵
DPI: 可自訂式、六段式按鍵
備註: 預設巨集、兩組Profile
軟件:有、自訂巨集
保用:1年

建議零售價:HK$199
查詢:升科 (3188 4983)

廣告