打Online Game技能愈黎愈多,好多時D技仲多到放滿晒鍵盤,不過對於打機用家黎講,咁嘅鍵盤擺位真係唔多健康,因為隻手要經常郁動,打得多隻手起枕就事小,關節受損先大件事,所以早前Razer就推出過多鍵設計嘅Naga,而近排Logitech都出埋一份,但評價就麻麻地啦,到底係真唔係呢?

  
 

首先講下外型先啦,G600體型偏大兼高身,而且右邊有一個G-Shift鍵,設計就限制手指擺位。左高右低嘅設計就明顯為姆指爭取最大移動範圍,按鍵就更精準。亦因為整體設計偏向一邊,加上G-Shift鍵要用無名指控制,所以尾指就更加緊貼底部防滑膠,如果手指粗些少你都咪話唔難頂。

  

講返G600最大賣點先,如果計埋D滾輪上下滑鼠帳面有20個鍵,加埋G-Shift雙倍按鍵就理論值有38個按鍵選項。咁正常用法之下滾輪左右唔計,左中右鍵唔計,放係中間嘅DPI都唔計,咁即係比平時五鍵滑鼠多10個制囉,加上G-Shift 都係實際再多12個。如果22個設計係MMORPG黎講都夠晒用,不過就真係要睇返施主道行夠唔夠啦。

不過講到最大爭議相信都係「到底撳唔撳得到」架,其實細心一睇就會發現每3個一排嘅按鍵實質係G13 同 G16 都有橫線指示,加上鍵盤每個鍵方向有別,其實都唔會容易撳錯。另外,鍵粒設計分別係每六個一組向內擺位,姆指可以好輕鬆係一組鍵粒移動,所以只要唔係過份用力,姆指用前組鍵粒係無咩可能會接觸到後組鍵粒。

身為一隻高階Gaming,自 HIGH LED又點會少得呢,不過係LED擺位就非常到位。設計上只有橫排(即G9到G20)加入多色LED燈,絕對方便到玩家查Profile。而且LED可以自訂顏色或者選擇漸變,加埋快慢速度,自 HIGH程度都有80分。

G600定位上都算係一隻高階滑鼠,規格就擁有1000Hz/ms 同 8200 DPI。不過始終一隻高階Gaming無法碼加重都係輸蝕D,就算本身重量適中都係咁話。而底部擁有兩塊一幅面腳墊,相對提供係撳制時既穩定性。

====================================================

講返Driver啦,G600終於有記憶功能,唔使需要每次重裝機就食鬼晒內建設定,軟件首頁就可以更換電腦設定檔或者內建記憶體,如果要set巨集設定檔就一定要係電腦設定檔搞埋。

 

 

內建記憶體下,按鍵設定嘅內容都係改下制同模擬鍵盤按鍵,只要開啟G-Shift鍵,就會出現擴展功能鍵。值得一提就係每個Profile都要獨立設定。

只要用電腦設定檔模式之下先可以設定自訂義巨集,可以即時錄製,配合少量修改功能都算易用。

不過作為一隻有8200DPI嘅Gaming只係得4段DPI真係有D不知所謂,而且DPI數值係唔可以用打字方式黎設定,認真吹漲。

 

最後就係改LED顏色,大致可以分為幻彩、漸變同熄燈,不過循環同跳動燈號就效果唔多明顯。

總結

G600雖然外型偏大,但實際對大手型用戶未算有太貼心嘅設計,而左高右低設計為手指爭取最大移動空間效果非常理想,而且鍵粒擺位都可以輕鬆使用。不過唯一係DPI只有四段設計,浪費咗8200DPI。而巨集同按鍵設定都無咩大問題,整體黎講以第一次出MMORPG Mouse叫合格有餘。

Van仔 測試後感

由於鼠身非常大隻,撳起黎有些少唔方便,如果一般用其實無太大問題,不過要真係要運用到側面按鍵就需要一定時間熟習。軟件方面,設定簡單都無咩好投訴,不過唯一就係G-Shift鍵要固定,無得改位置,變相令整體靈活性降低。

型號:logitech G600
移動制式:Laser 8200DPI
手形:極大, 高身, 右手專用
鍵數:20鍵
DPI: 可自訂式、最大四段
備註: 自訂巨集、三組Profile、幻彩LED
軟件:有、自訂巨集
保用:3年

價錢:$649
查詢:Good Century (3619 6500)/ Ingram Micro (2564 9203)

廣告