買得高階遊戲鍵盤,好多時都會先留意有無特別功能同巨集,而近年興起玩機械軸鍵盤之後,玩家就要求更多。無他嘅,俾足足成千銀去買隻鍵盤當然就想要多些少功能啦。巨集、多媒體鍵就緊係要有架啦,LED同其他擴充就愈多愈好啦。近期GIGABYTE就推出左全新嘅機械軸鍵盤Osmium,對於身價過千嘅佢到底有咩特異功能呢。

近幾年嘅Gaming 鍵盤,絕大多數高階型號都係擁有LED燈,雖然就話可以係黑暗環境容易搵制,但事實上主要都自High用。而Osmium就非常「出色」地用左藍色LED,不過係最大光度之下絕對會影響打機,所以一定要經鍵盤滾輪調教。

做得高階產品,巨集鍵就點可以無啦,不過Osmium就將五個巨集鍵擺係F1鍵上面,雖然Online Game 玩家黎講就相對就手,但一般巨集鍵都係set係鍵盤左側,方便玩家以無名指或者右手小幅度移動去撳制,所以巨集鍵擺頂無疑有局限使用嘅問題出現。GIGABYTE 亦吸取唔少低能嘅LED機械軸教訓,係巨集鍵隔壁就有兩個滾輪,功能分別係用黎調教LED光度同音量,而且撳滾輪一下可以熄燈同靜音,簡直就係本年度係機械鍵盤上最偉大嘅發明!

 

雖然多媒體按鍵就幾乎係所有高階鍵盤都會有嘅功能,但Osmium就用咗少有嘅獨立Fn鍵設定,取而代之就係無左鍵盤嘅Menu鍵。Fn鍵主要控制F1到F4嘅多媒體鍵,而Fn鍵隔壁仲送多個Win Lock鍵,啱晒成人撳錯制嘅朋友。另外,係LED指示燈上面就有一塊印有Aivia字樣嘅Profile鍵,Profile可設換五組,同時可以自訂顏色LED。

  

賣到貴一貴嘅鍵盤,好多時除咗按鍵上面有特別,就連擴充都有唔少驚喜。Osmium就專誠加入USB3.0、USB2.0同音效延長,由於有埋USB3.0,所以
不容置疑有一定程度吸引力。加上GIGABYTE加送幾粒無謂嘅鍵姆,誠意度爆燈。

  

 

GIGABYTE為咗迎合好似筆者依類麻煩友,鍵盤高度設計亦都有花過一翻功夫,除左加咗手墊位外,鍵盤同時擁有四點支架設計,換言之鍵盤可能有四種唔同高度設計,而前高後矮再加手墊嘅擺位方法就正正令到鍵粒成近水平狀,可適合不同玩家需求。

=================================================================

軟件方面,Osmium就同早前介紹過嘅KRYPTON係用埋同一個Driver,所以個樣就成個餅印咁樣架啦。

設定上,一樣可以揀開唔開晒五組Profile,但今次就無得set LED顏色啦。不過最唔明就係點解近排D Gaming野總係要有吸引燈先開心,隻眼仲未受夠刺激?

 

巨集功能設計非常簡單易用,而且支援鍵盤滑鼠輸入,對於有部份遊戲需要滑鼠鍵盤並用就相當啱用。值得注意,如果要set巨集鍵,Osmium就只係得G1-G5五個選擇,換言之你想改制加巨集都係得五個制,加埋Profile你都係得25個選擇,相對其他品牌可以全制改動黎講就真係差左些少。不過但於真係用都好少用嘅朋友咁就另作別論啦。

總結

Osmium以市面少有採用藍光LED紅軸機械鍵盤作為賣點,加上針對一般玩家嘅設計令普通人更容易接受。而且Osmium係現時少有加入USB3.0嘅Gaming鍵盤,整體設計相對適合非需求大量巨集嘅玩家。

Van仔 測試後感

筆者非常鐘意Osmium調教LED嘅方法,幾光幾暗自己揀。另外,採用四點支架令到鍵盤更加平坦,打起上來就比起其他品牌同類產品舒服。都係同樣問題,因為大部份成本去左LED同機械軸之上,所以成個設計都唔算有太大驚喜,巨集擺係上排咁少見嘅設計雖然唔多啱手位,不過真係好啱打Online Game個班玩家用。同埋大家要留意,Osmium只提供紅軸版本,對於用慣其他軸嘅朋友其實幾難接受到。

規格表:
鍵盤模式:標準、全Cherry 紅軸機械按鍵
巨集按鍵:5個巨集鍵、Profile更換鍵、Fn鍵、Win Lock
多媒體鍵:4個Fn鍵、音量滾輪
特別功能:Macro鍵、防鬼鍵設計、1000Hz/ms
驅動軟件:有,支援巨集設定、軟體式五Profile更換

售價:$1180
查詢:BASCO (3173 6080)

廣告