一向GIGABYTE Gaming產品俾人印象其實無咩特別,因為幾乎大部份Gaming產品個樣幾年都係一樣,就好似今次介紹既 M6980X,相信都唔少朋友仔都見過好幾次。今次規格有提升之餘亦加入Profile功能,對於有唔錯手感既M6900系列,強化版又會唔會令舊用家會更新呢?

 

對於出左三個版本既M6900黎講,M6980X最意外既係今次用左保護盒。盒既實際用途唔算大,因為海綿設計好難再將線材擺好,當便攜盒就可能要自己另搵海綿DIY。

按鍵方面,基本五鍵再配DPI、Profile循環鍵,其實設計有少少唔好,原因係早前平價版未加入Profile功能時,按鍵設計係DPI 增減,設計比較順手。另外,係兩個制之間分別有三個DPI LED,即意味 M6980X只係得三組DPI設定,對有成6000DPI黎講絕對唔係一件好事。值得一提就係滾輪,除左擁有四向設計,滾輪表面成斜面,完全配合整個滑鼠既人體工學。

  

有陣時筆者都會覺得GIGABYTE係傻,原因係比較佢地自家產品,低階產品永遠手感會好過高階。M6980X就以高大身型提供舒適人體工學,而且滑鼠高位接近中間,絕對係掌握型專用。此外,滑鼠左右兩邊都有防滑膠,層次設計有助捉緊同透氣,手感亦都一流。滑鼠整體向右微傾,滾輪斜面就岩岩好可以令手指以偏斜角度活動,滾動更為自然。更抵讚既係,左鍵設計偏大,食指可以更放鬆撳制。

=================================================

3

驅動軟件方面,GIGABYTE非常簡單易明,左邊就有預設功能選項,值得注意就係「瞬間加速」同「雙擊」功能,前者就類似之前介紹過其他品牌既指定DPI功能,不過就以指定速度提升。而「雙擊」就唔需要多講啦,由於無硬件調整,所以當二連射鍵就要考慮一下準確性既問題啦。

2

巨集功能又點少得呢,而且支援鍵盤滑鼠巨集錄製。

1

最後一提就係DPI設定,由於M6980X只係得三段轉換,所以以佢達到6000DPI既規格,其實要用到兩組Profile先會較容易控制滑鼠。不過值得一讚就係DPI設定可以XY軸獨立設定。

總結

GIGABYTE M6980X 其外型設計非常舒適,而且適合手掌大既玩家,而防滑橡膠手握同斜面滾輪設計細心。軟件提供既設定亦相當充足,加上定價$299更有一定吸引力。

Van仔 測試後感

由於M6980X擁有大型的左鍵設計,加上整體設計令手掌可以完全覆蓋滑鼠表面,無疑可以減輕手指壓力。軟件功能應有盡有,唯一缺點就係加入Profile鍵令DPI變成三段循環設計,導致有6000DPI都未必可以用到盡。

型號:GIGABYTE M6980X
移動制式:Laser 6000
手形:大型, 高身, 右手專用
鍵數:5鍵
DPI:循環式三段自訂
備註: 自訂巨集、三組Profile、二連鍵、瞬間加速
軟件:有、巨集
保用:1年

售價:$299
查詢:BASCO (3173 6080)

廣告