手汗多既用家打機最頭痛都唔係隻滑鼠會因為緊張而佈滿手汗,不過講到最慘都莫過於都係手汗入侵滑鼠表面防滑膠膜繼而造成既甩皮同溶解問題。因此,為解決手汗問題,TTeSports就以自己有生產散熱方案既優勢黎推出BLACK Element-CYCLONE,遠睇滑鼠真係有幾份似一隻氣墊船。

SONY DSC SONY DSC SONY DSC

首先就講下設計,CYCLONE屬於纖細外型,加上對稱設計,由高處睇都似足一隻指爪式滑鼠。不過只要由側邊一望就會發現前端部份較高,明顯想造到一個平衡設計,適應唔同玩家,所以需要較強指爪感既玩家就未必岩用。值得一提就係左右鍵採用波浪型設計,手指順放之下可以輕鬆撳制。

SONY DSC SONY DSC

CYCLONE雖然採用左對稱外型,但實際因為按鍵擺位問題,令到右手玩家係無可能撳到按鍵。而滑鼠按鍵左右兩邊排列分別為左3右1,由於左邊三個按鍵序列一線,而且按鍵較少,雖則唔會撳錯但都會降低舒適度。

SONY DSC

滑鼠中間部份就擁有兩個可設定按鍵,都因為擺位問題,按鍵設定大多數用DPI或者巨集快捷鍵之類,叫做比較有彈性。而中間滾輪設計非常特別,除左透光之餘,其大齒輪外型配上靜音設計令滾輪有唔錯手感。

SONY DSC SONY DSC

講到成隻滑鼠既賣點就一定係佢最獨特既散熱扇設計啦,風扇以Mini USB取電,規格約為3CM 6000轉,有輕微震動及聲浪(21.7dB),所以設計已經明確講左CYCLONE唔適合用黎打FPS,反而對長期作戰既Online Game或者即時戰略遊戲就會比較有實際功效。

SONY DSC SONY DSC

作為TTeSports高階Gaming產品,規格亦都有返咁上下啦,除左幾乎必送既滑鼠收納袋之外,CYCLONE亦都支援法碼加重功能,設計由五個4.5g法碼組合,由於本身都有返些少重量,以22.5g加都相當足夠。

為左方便玩家睇Profile,CYCLONE就緊係有自High LED燈啦,不過LED顏色就有非常多限制,得五色之餘兼且無得改強度,仲要硬食呼吸燈模式,你都咪話唔惡頂。要注意就係Profile鍵位於滑鼠底部,當然想瞬間轉Profile呃多幾個巨集鍵就唔好諗啦。

============================================

 1

講下軟件,TTeSports 跟既驅動軟件其他功能都真係幾簡單,唔似其他品牌將有一大堆分頁。設定上,主要最頂會見到可以設定既五個Profile,而下面就係每個Profile既按鍵設計,大家可能會好好奇右下個舊係乜野,但事實純粹係一舊計時器….

4

內建巨集設定已經係常識,而CYCLONE巨集可以支援鍵盤滑鼠輸入,設定都相當簡單。

3

依個LED設定真係可是講同無無咩分別,皆因只係on/off同固定五色,最sad既地方係LED顏色真係好肉酸咁囉。

2

一向後來TTeSports既DPI設定都係非常簡單易用,而且XY軸自訂仲幾方便,不過得四度DPI 最大6000都唔算夠用。而CYCLONE亦有1000Hz/ms反應時間。

總結

TTeSports BLACK Element CYCLONE 以風扇幫助降溫作為賣點,雖然有助手汗大既玩家解決問題,但始終風扇有一定震動,就算未影響滑鼠正常操作,不過都會有一定心理影響。因此,買得CYCLONE就可能預左唔係用黎玩FPS,而且係打機情況先安裝風扇。整體方面,滑鼠身型纖細,而且手形定位指爪跟緊貼式之間感覺略怪,建議手掌較細的玩家可以考慮使用。

Van仔 測試後感

由於筆者甚少打RTS遊戲,如果以MMO遊戲而言的確有助幫手掌降溫,不過指爪情況下手心出汗加埋風扇凍風真係會想拆風扇。打FPS方面,雖然無阻礙瞄準,不過某程度因為風扇冷風同震動既關係,的確會令人有「賴地硬」既感覺,只可以講概念滿分,實行未如理想。整體規格因為採用BLACK Element設計,手掌細既玩家的確會有唔錯既手感,如果以$599賣一個獨有風扇設計都有一定吸引力。

型號:TTeSports BLACK Element CYCLONE
移動制式:Laser 6000
手形:中型, 高身, 對稱
鍵數:9鍵、Profile 鍵
DPI:可自訂增減
備註: 自訂巨集、計時器、3cm風扇6000RPM (21.7dB)
軟件:有、巨集
保用:2年

售價:$599
查詢:BASCO (3173 6080)

廣告